Ny mpivady dia olon-droa mifankatia, manana tanjona iraisana, nifanaraka fa hiara-dia amin'ny fiainana, nanao voady sy dina hanorina tokantrano , hanorina fianakaviana , hiarak' ory sy hiara-paly ka hiaraka hamakivaky ny fiainana.
Ireo dingana lalovan'ny mpivady : fifamofoana, fanambadiana, fiterahana, na tsy fiterahana koa, fanabeazana ny zaza , fahaleovantenan'ireo ankizy , fisotroan-dronono, fahaterana ….
Mivoatra toy izany koa ny fitiavana , ny fiaraha-monina ary ny toetra.
Ireo olana mety mitranga: aretina , fahafatesana , fisarahan-toerana, tsy fahitana asa, tsy fahampiam-bola …
Ny ady sy ny fifandirana dia lalana lalovan'ny mpivady rehetra . Misy lafiny mahatsara azy fa raha be loatra koa dia mamizan-tsaina .
Toro-hevitra vitsivitsy mety hahasoa ny tokantrano, sy hampaharitra ny fitiavana :
- Tratraro ny tanjona izay ilainao sy tadiavinao ary irinao, na dia tsy mifanaraka foana amin'ny izay ilain'ny vady azy izany.
- Miarŕha mizara tetik'asa sy ny fialamboly amin'ny vadinao.
- Manŕna tetik'asa anao samirery , fa aza miandry lava ny vadinao vao manao zavatra.
- Mianŕra mizaka-tena fa aza miakin-dava amin'ny vady.
Hevitra momba ny mpivady:
Ny tokatrano mateza sy vady maharitra dia tsy midika hoe vady be fitiavana.
Ny manambady dia tsy midika hoe very fahaleovan-tena,
Ilaina ny fifampizarana hevitra fa saingy tsara koa ny mitazona izay tokony ho an'ny tena ary tsy voatery hilaza izay rehetra iainana raha mety hanimba ny tokantrano.
Hoy ny ohabolan-tsika hoe "Natoky fitiavana loatra , ka nitanjaka imasom-bady !"
Toro-hevitra mety hahatsara ny fifandraisana sy ny fiara-monina
Ny adin'ny mpivady
- Aza andosirana ny ady sy ny fifandirana, fa ampiasao mba hivoarana ao an-tokantrano.
- Ilaina ny fanakalozan-kevitra sy ny fifampiresahana ny zava-misy iainana sy ny fihetseham-po, aza atao tompon-trano " mihono " ny vady.
- Aza vinavinaina na tsaraina ivelany ihany izay mety ho hevitrin'ny vadinao.
- Aza manapa-kevitra an-katezerana , "ny fo rano mafana ka mandoro ny tompony ihany " , ka mahaiza mampitony ny fo
- Tsy resy akory ny olo-mangina raha misy ny ady , ary ny manambitamby tsy olon-dresy
- Hajao ny hevitra tsy mitovy , aza maneso na manambany ny hevitrin'ny hafa.
Ny fampisehoana fitiavana
- Tsara koa ny manome fa tsy ny mandray fotsiny ihany.
- Ampisehoy (aminy teny , fihetsika , fomba ) fa misy vidiny aminao ilay olona.
- Aza atao mpameno ny banga ao amin'ny fiainanao fotsiny ilay vady fa omeo toerana ao am-po sy ao an-tsaina.
- Ny fifanajana, manaja vady , manaja tokatrano.
- Ataovy matotra sy lalina ny fifandraisana fa namana akaiky indrindra koa ny vady.
Mba hisian'ny fivoarana ary dia samia manontany tena momba ny vady :
- Sambatra ve aho ato an-tokatranoko ?
- Inona no andrasako sy tadiaviko amin'ny vadiko ?
- Inona no antony hijanonako amin'ny vadiko : ny ankizy ve ? ny tombotsoa ve ? tsy mana-tsafidy ve ? tsy fahaleovan-tena ve ? fahatahorana ny ho avy ve ? sa ny fitiavana sy ny voady izay natao ?
- Misy vidiny amin'ny vadiko ve aho , ary misy vidiny amiko ve izy ?
- Mbola misy ve ny fitiavana ?Azoko ho soloina olon-kafa ve izy , sa azony ho soloina olon-kafa ve izaho ?
- Inona no antony maha te handao ny vadiko : sorisory lava ?, fahanginana ? , tsy firesahana sy tsy fifanakalozan-kevitra ?, teny masiaka ?, ady lava ?, tsy fahafahampo ? fahasarotam-piaro ? sa tsy misy intsony ny fitiavana ?
- Inona no tiako hiova ato an-tokantranoko ?, ary inona no hataoko na hataonay mety hampiova izany ?
Ny fampirafesana sy ny manitsakitsa-bady
Ny fampirafesana sy ny fanitsakitsaham-bady dia vokatrin’ny olana samy hafa ao an-tokatrano, ny tsy fahafaham-po ary ny tsy fahampiam-pitiavana (une conséquence mais pas une cause)
Tsy mitovy ny antony fampirafesana fa amin’ny ankapobeny dia ny « tsy fahafaham-po » no antony voalohany satria tsy ampy na tsy misy intsony ny : firesahana , fifanakaloza-kevitra, firaisana ( vie sexuelle), fanehoam-pitiavana, fanajana, fankasitrahana , fialamboly ) . Mahatsiaro irery ao am-po ilay olona nefa manambady, toa tsy misy vidiny intsony…
* Raha misy ny fampirafesana dia midika fa misy ny olana ao amin’ny mpivady. Samy manana andraikitra amin’izany izy roa fa saingy ny lanjany no tsy mitovy.
Na misy aza ny olana dia tsy ny olona rehetra akory no afaka mampirafy, fa arakaraka ny toetran’ny olona tsirairay avy, ny fomba nitaizana azy, ny tantaram-piainany, ary ny fahazarany koa.
Misy koa olona izay tsy matotra, mitsingevan-kevitra, entim-po, mpamaly faty.
Ny fotoana sy ny toerana samy hafa dia mety mampihaona ny olona ka miteraka fitsiriritana sy fankam-panahy, indrindra raha marefo ny tokatranony.
* Misy karazany ny fampirafesana sy ny fanitsakitsaham-bady ( mandalo, vetivety tsy misy tohiny ) ary misy ny maharitra izay manambara fa manakaiky ny fisarahan’ny mpivady.
Matetika dia ny fahafinaretan’ny vatana sy saina no ambara fa tadiavina, satria lavitry ny olana misy ao an-tokatrano mahazatra. Mahatsiaro ho « tiana sy misy vidiny indray » eo imason’ilay olona vaovao.
Ny vehivavy dia tsy manafina loatra izay ataony raha mampirafy izy, ary ny filazany sy ny firesahany izany aman’olona dia fomba hanamaivanany ny eritreriny .
Ny lehilahy kosa dia tsy tia miresaka, na tsy manana heri-tsaina hilaza ny marina, izay ilay hoe mamitaka.
Ho fehiny : misy lalŕna mifehy ny tokantrano, na eo amin’ny fiaraha-monina na ao amin’ny maha Kristiana.
Misy ny ara-dalŕna misy ny tsy azo atao ary misy ny tsy tokony hatao.
Ny famakafakana izany no mifehy ny olona tsirairay avy ao an-tokatrano na misy aza ny zavatra tsy zaka sy ny tsy fahafaham-po.
Hoy ny ohabolana :
“ Bolokilahy homamboan-tseva , ka mamy ny atsy , fy ny aroa”
“Mahita ny akanga tsara soratra ka manary ny akoho taman-trano”
“Aza atao fitia paraky ka rehefa matsatsotsatso dia ariana”
“Aza fatra-pitady ny manganana fandrao sendra ny mangidy tsy ho telina”
“Tano ny azo fa sarotra ny mila”.
“Ny tokantrano toy ny jiafotsy, ka vao tsy ialan-kasokasoka, tonta tsy ialan-dromoromo.”